Bíonn fáilte roimh iarratas ó ealaíontóirí gan bheann ar náisiúntacht, cine, eitneacht, inscne ná claonadh gnéis. Tugtar tús áite do thograí lena gcíortar réimsí trasnaíola idir cúrsaí eolaíochta agus ealaíne nó ar gnéithe de thimpeallacht faoi leith an ionaid seo an t-ábhar spreagtha acu. Bíonn iomaíocht ghéar ag baint leis an gclár tréimhsí cónaitheachta lánmhaoinithe seo. Má tharlaíonn nach féidir glacadh leis an togra sin agatsa faoin gclár cónaitheachta, ba bhreá linn dá smaoineofá ar chomhaltacht in Interface. Tá dream caoithiúil comhaltaí á gcur le chéile againn a bhfuil ar a gcumas taispeántais a léiriú nó tréimhsí cónaitheachta agus forbairt tionscadail a eagrú.

Idir coicís agus ceithre seachtaine a bhíonn sna tréimhsí cónaitheachta. Cuirtear spás stiúideo agus lóistín ar fáil don ealaíontóir cónaitheach. Tá sorn breosla sholadaigh san áit ar mhaithe le teas agus tá preas priontála, teilgcheárta cré-umha, airnéis adhmadóireachta agus trealamh closamhairc ar fáil freisin. Tá tuilleadh eolais faoin trealamh ar fáil anseo.

Tá an stiúideo 20-25km ó na roghanna éagsúla lóistín. An t-ealaíontóir féin atá freagrach as taisteal go Conamara agus ar ais abhaile, as taisteal i gConamara agus as ábhar nó saothar ealaíne a thabhairt abhaile. Is oth linn gur amhlaidh an cás ach nuair nach mbíonn iompar poiblí ar fáil go minic i gConamara agus ó tá na bóithre an-chontúirteach, tá bunriachtanas le ceadúnas tiomána. Teastóidh úsáid cairr le taisteal idir an spás stiúideo agus an áit lóistín, mar sin b’fhéidir gur gá duit carr a fháil ar cíos. Idir 9-17 ó Luan go hAoine a bhíonn cead isteach i bhfoirgneamh an stiúideo agus is maith an rud do chuid oibre a phleanáil dá réir sin. Is iondúil go gcaitheann ealaíontóirí an deireadh seachtaine le taighde agus ag cur eolas ar an gceantar. Réigiún iargúlta é agus titeann go leor báistí ann. Is maith an rud sin a thabhairt san áireamh freisin maidir le cúrsaí pleanála. Níl an socrú cónaitheachta seo cóiriúil do leanaí.

Féachtar le cuidiú leis na healaíontóirí ar gach bealach inar féidir sin agus cuirtear ealaíontóirí in aithne do lucht ealaíne an cheantair trí chruinnithe nó cainteanna ealaíontóra a eagrú.

Níl an socrú cónaitheachta seo cóiriúil do leanaí.

Déantar iarratas ar thréimhse cónaitheachta trí chomhad pdf a sheoladh chuig an seoladh interfaceinagh@gmail.com. Is ceart na nithe seo a leanas a bheith san áireamh sa chomhad pdf:

• An togra maidir le do thréimhse chónaitheachta (uas. A4)
• CV
• Ráiteas an Ealaíontóra
• Ocht gcinn de shamplaí, íomhánna nó naisc, de shaothair de do chuid le gairid.

Gairm atá Oscailte faoi láthair:

• Níl faoi láthair.

Luaitear le do thoil an tréimhse chónaitheachta a bhfuiltear ag cur isteach uirthi i líne an ábhair leis an teachtaireacht ríomhphoist.