Tá Interface suite in ionad a tógadh ina ghorlann bradán ar dtús i ndeireadh na 1980idí.Scott Tallon Walker na hailtirí a chuir Carrolls, an comhlacht tobac, ar coimisiún leis an ngorlann bradán ba nua-aimseartha ar domhan a leagan amach. Bhíodh gorlann uathoibríoch faoi smacht ríomhairí á rith ag an gcomhlacht sin agus brainlín á sheoladh chuig feirmeoirí bradán amach ón gcósta ar heileacaptar. Is é a chuaigh in aghaidh an ghnó sa deireadh go raibh an mhonarcha róchrochta os cionn an locha agus go raibh athshruthlú an uisce róchostasach dá bharr. Tráth ar dúnadh an gnó sin, bhí foirgneamh nua-aoiseach, fada, íseal fágtha folamh ar bhruach Loch Dhoire an Chláir. Cheannaigh na húinéirí reatha an t-ionad sa bhliain 2007 d’fhonn ionad taighde agus forbartha eolaíochta a thabhairt chun cinn ann.

Tá deich mbliana caite ó shin i leith ag obair ar an gcuma is fearr a chur ar an bhfoirgneamh a ndearnadh róchúram innealtóireachta de agus ar an áitreabh tionsclaíochta ina thimpeall ar mhaithe le tionscadail dobharshaothraithe atá stuama ó thaobh na heitice agus na héiceolaíochta. Ar na tograí a saothraíodh, áirítear stáisiún taighde maidir le feirmeoireacht feamainne agus táirge a chosnaíonn an bheach ar an bhfíneog varró agus ar an víoras nóiseamóise. Tugadh sa bhliain 2019 faoi thogra athchóiriúcháin coillearnaigh a bhfuil de rún leis coill de chrainn dúchais a chur san áit a bhfuil sprús Sitceach ina fhoraois. Beidh réimse leathan seirbhísí éiceachórais ar fáil dá bharr sin maidir le bithéagsúlacht na coillearnaí dúchais chomh maith le tairbhe a dhéanamh do na sruthanna uisce sa cheantar máguaird.