Faoi Interface

Stiúideo agus clár tréimhsí cónaitheachta do dhearcealaíontóirí, do dhamhsóirí, do scríbhneoirí agus do cheoltóirí atá i gceist le Interface atá suite i nGleann Eidhneach i gceartlár Chonamara. Is é a chuirimid de mhisean romhainn deiseanna sáraitheacha a chur ar fáil d’ealaíontóirí ionas go bhféadann siad a gcuid oibre a shaothrú agus oibriú le daoine eile trí ardán faoi leith lena ndéantar cíoradh ar na réimsí trasnaíola idir taighde eolaíochta agus an ealaíon.

Tá an stiúideo suite in aon áitreabh le hIontaobhas Ghleann Eidhneach a chuireann tionscadail nuálaíochta maidir le taighde eolaíochta chun cinn sa Gleann Eidhneach. Tugann Interface deis d’ealaíontóirí dul i ngleic le timpeallacht ar leith agus spreagadh a fháil ón taighde spéisiúil atá ar siúl sa taobh tíre sceirdiúil.

Mar ghorlann bradán a tógadh an t-ionad ar dtús i ndeireadh na 1980idí.Scott Tallon Walker na hailtirí a chuir Carrolls, an comhlacht tobac, ar coimisiún leis an ngorlann bradán ba nua-aimseartha ar domhan a leagan amach. Bhíodh gorlann uathoibríoch faoi smacht ríomhairí á rith ag an gcomhlacht sin agus brainlín á sheoladh chuig feirmeoirí bradán amach ón gcósta ar héileacaptar. Is é a chuaigh in aghaidh an ghnó sa deireadh go raibh an mhonarcha róchrochta os cionn an locha agus go raibh athshruthlú an uisce róchostasach dá bharr. Cheannaigh na húinéirí reatha an t-ionad sa bhliain 2007 d’fhonn ionad taighde agus forbartha eolaíochta a thabhairt chun cinn ann.

Idir coicís agus ceithre seachtaine a bhíonn sna tréimhsí cónaitheachta. Cuirtear spás stiúideo agus lóistín ar fáil don ealaíontóir cónaitheach. Níl an socrú cónaitheachta seo cóiriúil do leanaí.

Tairgtear lóistín le dreamanna éagsúla ar an gClochán, i Leitir Fraic nó i Maigh Ard. Is oth linn gur amhlaidh an cás ach ní bhíonn iompar poiblí ar fáil go minic i gConamara agus tá na bóithre contúirteach. Is den bhunriachtanas go mbeadh ceadúnas tiomána agus úsáid cairr ag an ealaíontóir.  Pléigh sin linn, le do thoil, más rud é go mbeadh ort leas a bhaint as. Déanann Alannah Robins , dearcealaíontóir agus ceoltóir an obair comhordúcháin maidir le Interface in éineacht le Emma O’Flaherty, bainisteoir cláir, agus John Durning, oifigeach comhchaidrimh phoiblí.